الشاعرة: مداهيل

” ياسيدي “

ياابو فهد ياسيدي يا بليهان..
يالقايد العادل لشبه الجزيره..

ياجامعاً هيبه مع طيبه وشان..
يادولةً تامر ببصر وبصيره..

ياسيدي ماشفت عيوني انسان..
من خلقت الدنيا ونبض السريره..

انسان له يدين واثنينها ايمان..
الا انت ياراعي اليدين الطهيره..

يمينك محمد صميدع كحيلان..
ويمينك الاخره جيوش سهيره..

خذ الولاء ياسيدي سر و اعلان..
عاهدتكم سمعاً وطاعه وغيره..

المملكه ياابو فهد خير الاوطان..
محفوظةً من كل نفسً شريره..

من دونها شيب وشبابً ونسوان..
الشعب كله من كبير و صغيره..

لا صاح احد باقصى جنوبك يانجران..
جاوب صداه اللي شمال الحفيره..

بالجو نفاثه وبالارض شجعان..
سيلاً يشق الارض قوة هديره..

وبالبحر اساطيل وبواخر وربان..
منظر يخيف اهل النفوس الحقيره..

وحتى البني يابوي من دون حقران..
وقت الشدايد نشتعل كالسعيره..

ابشر ترى لو ماني بقايد اركان..
اقودها وامشي الدروب الخطيره..

بي فورةً اقرب لها فور بركان..
في لحظه يدمّر من الهول ديره..

هذا الخبر ردوه لفلان و فلان..
دون الوطن حنا سلاح وذخيره..

نامي قريرة عين يادار الايمان..
ياديرتي نامي وعينك قريره..

تراني محسوده على ابياتي الآن..
يوم العدوا مقهور ملعون صيره..

حطوا لي اخر بيت بالصحف عنواني..
وذيعوه بالمذياع لا ذاع اثيره..

ان مت قبل اصافح كفوف سلمان..
وصوه تدفني يديه الطهيره..