حمد الدليهي
لامال قرص الشمس والحزه غْروب
حانت مواعيد التناهيد حـانت
البس له اقدوم المُعاناة لي ثوب
واجمل مـلذات المواجيب شانت
من شفتها تعطيني العلم مقلوب
عـرفـت نيتها علـى الصـد بانت
واسلوبها الاول غدى غيره اسلوب
صــار القسـا معها ولا عاد لانت
في قلبها لاصرت مانيب مرغوب
الـوصـل معـها مات واقول كانت
حطيتها في صوب وامسامري صوب
شيعت جثمان الوفاء يوم خانت
والصبر بعض احيان مايقضي النوب
لو تغري الايام وتقول زانت
مايطرد المقفين رجال محسوب
حـسـب السلوم وعـزةٍ مـاتدانت
