صبحكم الله بالخير يا ويوه الخير، صباح آخر احد قبل اجازة العيد اللي ما شاء الله ثلاث ارباعكم بيقضيها بالكويت، وهذا اللي تفاجأت منه عقب ما شفت نتيجة الاستطلاع اللي سوته الحبيبه القبس، واللي اشارت نتيجته ان %73 من سكان وطن النهار راح يقضون اجازتهم اللطيفه الطويله الخفيفه الونيسه في ربوع الكويت، يعني ان شاء الله اكو بيزات راح تدش واكو اقتصاد راح ينتعش واكو عجله راح تدور وهذي طبعا بشارة خير.
المهم ما قصروا اللي راح يقضون اجازتهم في ضواحي الكويت بس هالله هالله ما اوصيكم، ما نبي مشاكل، ما نبي طقني واطقك، ما نبي مقاطع فيديو اتفشل، وناس فاقده وعيها تترقص بالشوارع على كيكي وجيجي وغيرهم، وحق اللي يقعدون على البحر وبالحدايق لو سمحتوا وتكرمتوا على ما تاكلون وتتبطحون وتخلصون شيلوا مخلفاتكم معاكم مو اتخلونها مرتع حق القطاوه والفيران.
وشي ثاني بقوله قبل لا استهل بهذرة اليوم: حج مبرور وذنب مغفور وسعي مشكور حق كل حجاج بيت الله الحرام، عسا ربي يتقبل منكم وحمد لله على سلامتكم مقدما.
اليوم يا محفوظين السلامه بهذر عن شي يمكن اهو مو يديد بس الصراحه بالنسبه لي اهو عجيب وللأمانه يمكن اقول عنه أعجب من العجيب.
طبعا ما يختلف اثنين ان احنا يالله من فضلك بلمح البصر نصير شي من لا شي، يعني فجأة وحده توها متعلمه اتخط الكحله صارت خبيرة تجميل وتعطي نصايح وتسوي دورات، ووحده طول عمرها تلبس شماطيط وخلاقين من كل زيج رقعه وفجأة وبلا مقدمات تلقاها اتطرش دعوه افتتاح الأتيليه ما لها ولا المعرض اللي امسويته، طبعا لا تسألوني اشلون؟ لأن ما أدري بس هذا الدارج عندنا، وواحد كان ياكل الأسباغيتي بإييده ويسمي السلطه زلاطه فجأة تلقاه يعلم الناس الإتيكيت واشلون يقصون الخيار بكل حنان ودلال، ووحده امدششه عمرها بكل شارده وواردة يعني تبيها بالسياسة عند ويهك، تبيها بالأزياء عند ويهك، تبيها بالتربيه عند ويهك، تبيها بالغناوي والرقص عند ويهك، بأي شي تلقاها عند ويهك، المهم انها تكون متواجده بالساحه وتكون طالعه بالشاش وتكون لاصق عمرها بكل واحد او وحده صيتهم عالى اللهم يا كافي، وغيرهم نماين وايد لو بقعد اسطرهم لكم ما نخلص.
ومن هالنماين اللي ربي بلانه فيهم اكو فئه يسمون عمرهم مدربي الحياة عشتوا، ما دري على أي اساس طلعوا هالاسم على عمرهم ومنهو اللي عطاهم اياه، فهذي الفئه من البشر قطوا لهم جم بيزه ودشوا دورة تنمية بشريه على قولتهم وعقب ما خلصوا هالدوره اتفخوا عمرهم وغيروا يلدهم اللهم يا كافي وبدوا يعيشون الدور اليديد من حياتهم اللي يمثلون فيه ويقصون فيه على روحهم بالمقام الأول وعلى المينن اللي يطيعونهم ويصدقونهم وحسبالهم انهم صج.
من طق طبله قال انا قبله!
«من طق طبله قال انا قبله» من اكثر الأمثلة الشعبية اللي تنطبق على حال البعض بوطن النهار، اهو مع المثل اللي يقول «مع الخيل يا شقرا» لأن احنا وللأسف أي شي الناس هابين فيه واي شي يلفت الأنظار ويخلى الناس تتكلم ويخلي الناس تتدوده ويسوينه ماده اولى بتويتر وربعه انهب فيه وانسويه حتى لو اهو ما يشبهنا ولا اهو موديلنا بس لزوم الـ show، وهبة مدربي الحياة وحده من الهبات اللي ابتلشنا فيها بالكويت، يعني ما بقى احد ما صار مدرب حياة يهل عليك من صباح الله خير ويقول لك صباح الشمس المشرقه ذات الأشعه الممغنطه على اساس ان الاخ يايب اليهده بالقافيه، ولا تطلع لك وحده ما يندرى منو امقعدها من النوم حتى ما مهلها اتغسل ويها ولا اتمشط قفتها وتقول حل التقلقص عندي وانا ام هندي عقب اليوم ماكو ولا وحده من حريم الكويت اذا مو المعموره راح تتقلقص بحياتها، خلاص حل التقلقص عندي، وللأمانه ماني عارفه شنهو التقلقص اللي تقدر اتحله هالمخلوقه اللي ما غسلت ويهها من النوم، هذا غير اللي يتحفونك فيه هالمدربين المعتمدين في فلسفة الحياة واللي تقول وحده منهم update مخ ومخيخ المرأه الكويتية وايد قديم لأنه مبرمج على انها لازم تتزوج واتييب اعيال واتكون اسره، الصراحه ما ادري شنهو الفيرجن الحديث اللي عند الآخت فلتت زمانها اللي يعارض الطبيعة الانسانية اللي شرعها رب الخليقه والكون، شنهو يعني التطور اللي عندج يا حضرة المدربة؟
واذا كان التفكير بالزواج والاستقرار وتكوين اسرة وايد قديم عيل ليش كل واحد منكم يا حضرة المدربين اعياله طوله؟ ليش ما تصيرون قدوة حق غيركم؟ طبعا مو الكل لأن في بعضهم حياته متكوكسة فوق تحت ويعاني من التفكك الأسري علشان جذي يبي يعم الشر على باجي الأوادم المستقرة، هذا غير لما يطلع لك واحد الكويت كلها تدري شنهو التاريخ العائلي والبيولوجي له وفجأة يصير ملهم ويعطي نصايح ومواعظ اشلون اتعيش يومك بدون ما توصخ اهدومك عاد انتوا اخذوا وشكوا من هالجمل اللي من هالقبيل.
عفية اشوية رحمة!
وايد اؤمن بمقولة «رزق الهبل على الميانين»، بس ما عليه كيفهم كل واحد يقط نوطه وين ما يبي بس السالفة مو واقفة على قطة الفلوس جان الواحد قال كيفهم نارهم تاكل حطبهم. السالفة ياجماعة الخير فيها خراب بيوت عامرة، السالفة فيها تقليد أعمى بدون تفكير، السالفة فيها تفكك اسر والسبه بعض مدربي الحياة اللي يبيلهم احد يدربهم ويمشيهم على الصراط المستقيم علشان يعرفون ان الله حق، لأنه للأسف اكو وايد ناس في سبيل الفلوس عادى عندها اتسوي أي شي فتلقاهم يقصصون على هالحريم وعلى هالرياييل ويقولون لهم انت ولا انتي مو عايشين لازم اتعيشون، انتوا تستاهلون حياة افضل واسعد، انتوا داخلكم بركان من السعادة والأناسة لازم اتفجرونه قبل لا ينفجر فيكم وكل هذا طبعا يصير بشوية حركات وتبحلق بالعين وصوت رومانسي ورسايل، واحنا الله خير من حرك بلش من احد ايي على الوتر العاطفي والرومانسي ننهار ما نقدر، من احد يقول لنا انتي دانه والطواش اللي عندج بالبيت موعارف قيمتج يا عين هاتي ما خفيتي يبدي مسلسل البجي والنواح والتحسر على العمر اللي راح، ومن احد يقول لنا انتي لي متى دافنه روحج بالبيت لي متى حياتج عيال ودوام انتي تستاهلين اتنامين وانتي امغمضة عينج على برج ايفل وتفتحينها وانتي اتسوين رياضة الصباح مع البط بالهايد بارك، وعاد انتوا تخيلوا شنهو اللي راح يصير عقب هالتكوك والتشيش، احنا بروحنا منهارين من نقص الحنان والجفاف العاطفي الحين نلقى احد يجابلنا ويقول لنا ان للحين في امل وللحين الحياة اتنادينا؟
عاد انت عزيزي القارئ لك ان تتخيل مسلسل الدمار الشامل اللي راح يصيب البيوت الكويتية العمرانة اللي انقص على الزوجة والزوج فيها من بعض مدربي الحياة اللي ما يندرى شهادتهم مضروبة اوتي مثل غيرهم ولا صج ماخذينها، وان كانوا صج ماخذينها المفروض انهم يصلحون مو يهدون.
آخر الكلام
عيدكم مبارك وعساكم من عواده وحج مقبول وذنب مغفور لحجاجنا الأعزاء، راح افككم من هذرتي الفترة اليايه لأني بكون بإجازة خاصة خارج اسوار وطني الغالي
